Инфекция ва и нфекцион касалликлар

Оддий инфекция, моноинфекция — вирус ёки микроорганизмнинг бир тури пайдо қилган инфекция.
Регионал инфекция (лот. regie — маълум ҳудуд, жой) — айрим касаллик қўзғатувчилар (туберкулёз — сил, бруцеллёз, туляремия қўзғатувчилари ва б.қ.) организмга киргандан кейин дастлаб лимфа йўллари билан лимфа тугунларига жойлашиб, бирламчи инфекция ўчоғини пайдо қилади. Натижада лимфа тугунлари жароҳатланади.
Респиратор инфекцияси (лот respiratorius — нафас орқали) — ҳаво орқали юқадиган инфекция.
Секин кечувчи инфекция — касал қўзғатувчиси организмга киргандан кейин яширин даври жуда узоқ бўладиган, секин ривожланадиган юқумли касаллик (лейкоз, висна ва меди, скрепи, аденоматоз ва ҳ.к.).
Секундар инфекция (лот. secundarus — иккиламчи) — бирламчи (асосий) инфекция устига қўшилган иккиламчи инфекция. Бу, биринчи инфекция ўтишини оғирлаштиради. Масалан, пастерелла ва салмонелла бактериялари чўчқаларда ўлат касаллиги ўтишини оғирлаштиради. Одатда, иккиламчи инфекция кўпроқ шартли қўзғатувчилар гуруҳига кирувчи микроорганизмларга алоқадор бўлади. Улар терида ва шиллиқ пардаларда яшаб, фақат организмнинг касалликларга чидамлилиги пасайган пайтда ўз фаоллигини оширади ва касаллик қўзғатадиган бўлиб қолади.
Спонтан инфекция (лот. spontaneus — ўз-ўзидан) — табиий шароитда ўз-ўзидан юзага келадиган юқумли касаллик.
Сунъий инфекция — касаллик қўзғатувчиларини сунъий равишда юбориш йўли билан пайдо қилинган инфекция.
Тарқалган инфекция — микроорганизмларнинг ҳайвон организмидаги ҳимоя тўсиқларини ёриб ўтиб, бутун организмга тарқалиши натижасида вужудга келган инфекция.
Томчи инфекцияси — касаллик қўзғатувчисининг касал ҳайвондан ажралган шилимшиқ, суюқлик заррачалари билан қўшилиб, ҳайвоннинг нафас йўлларига тушиши натижасида ҳосил бўлган инфекция.
Трансмиссив инфекция (лот. transmissibilis — берилувчи) — қон сўрувчи бўғим оёқлилар, кемирувчилар ва бошқа вирус, микроб ташувчилар томонидан тарқатиладиган юқумли касалликлар.