Investitsiyalar va moliya bozori

4.3. Normativ huquqiy baza
O‘zbekistonda qimmatli qog‘ozlar bozorini rivojlantirish maqsadida 1991-1995 yillar, ya’ni 1-bosqichda qabul qilingan huquqiy hujjatlar xususiylashtirish jarayonlari bilan va institutsiyaonal tuzilmalarni shakllantirish jarayonlari bilan bog‘liq ravishda qabul qilingan. Ushbu davrda “Davlat tasarrufidan chiqarish va xususiylashtirish to‘g‘risida”, “Banklar va bank faoliyati to‘g‘risida”, “O‘zbekiston Respublikasining tashqi iqtisodiy faoliyati to‘g‘risida”, “Qimmatli qog‘ozlar bilan amalga oshiriladigan operatsiyalardan olinadigan soliq to‘g‘risida”, “Aksiyadorlik jamiyatlari va aksiyadorlarning huquqlarini himoya qilish to‘g‘risida”, “Qimmatli qog‘ozlar va fond birjasi to‘g‘risida”gi O‘zbekiston Respublikasining Qonunlari qabul qilingan. Shuningdek, mazkur davrda uyushgan qimmatli qog‘ozlar bozori faoliyatiga oid bo‘lgan “Davlat mulki bo‘lgan korxonalarni aksiyalashtirishni jadallashtirish va qimmatli qog‘ozlar bozorini takomillashtirish chora-tadbirlari to‘g‘risida”gi PF-1164-son O‘zbekiston Respublikasi Prezidenti Farmonlari qabul qilindi.
4.11-Jadval
O‘zbekistonda uyushgan qimmatli qog‘ozlar bozorining huquqiy asoslari

Bosqich	Davr	Qabul qilingan huquqiy hujjatlar
1-bosqich	1991-1995 yy.	O‘zbekiston Respublikasining Qonunlari: “Davlat tasarrufidan chiqarish va xususiylashtirish to‘g‘risida” 19.11.1991 y. “O‘zbekiston Respublikasining tashqi iqtisodiy faoliyati to‘g‘risida” 14.06.1991 y. (Mazkur Qonun 26.05.2000 yilda yangi tahrirda qabul qilingan) “Birjalar va birja faoliyati to‘g‘risida” 1992 y. “Qimmatli qog‘ozlar bilan amalga oshiriladigan operatsiyalardan olinadigan soliq to‘g‘risida” 05.05.1994 y. (Hujjat kuchini yo‘qotish sanasi 20.01.1996 y.) “Aksiyadorlik jamiyatlari va aksiyadorlarning huquqlarini himoya qilish to‘g‘risida” 26.04.1996 y. (Mazkur Qonun 2014 yil 6 maydagi O‘RQ-370 sonli Qonuniga muvofiq yangi tahrirda qabul qilingan.) “Qimmatli qog‘ozlar va fond birjasi to‘g‘risida” 02.09.1993 y. (Hujjat kuchini yo‘qotish sanasi 23.07.2008)