U. ǴAfurov, Q. Sharipov

ISBILERMENLIKTIŃ TIYKARǴÍ TÁREPLERI
Eger isbilermen bolıwdı qáleseńiz, siz ózińizde isbilermenliktiń 
tiykarǵı táreplerin qáliplestiriwińiz zárúr boladı. Olar tómendegilerden 
ibarat:
1. Baslamashılıq. Isbilermen óz ideyasın ámelge asırıp, payda 
alıw maqsetinde ekonomikalıq resurslardı óz ara birlestiriw arqalı 
jańa ónim jetistiriw hám xızmetler jaratıw baslamasın alǵa qoyadı.
2. Táwekelshilik. Isbilermen óz xızmetin qanshelli puqta reje-
lestiriwine qaramastan, onıń tabısqa erisiwine kepillik joq. Xızmet 

---

5
dawamında onıń nátiyjesine keri tásir etiwshi júdá kóp qáwip-qáter 
(risk)ler payda bolıwı múmkin. Isbilermen — bunday hár túrli qáwip-
qáter, tosqınlıq hám mashqalalardan qorıqpastan, óz maqsetine erisiw 
jolında táwekelshilik ete alatuǵın shaxs bolıp tabıladı.
3. Juwapkershilik. Isbilermenniń baslaması hám táwekelshiligi 
negizinde onıń juwapkershiligi, yaǵnıy óziniń is-háreketi ushın mal-
múlki hám resursları menen juwap beriwge tayar turadı.
4. Jańalıqqa umtılıw. Isbilermenliktiń mazmunında jańalıqqa 
umtılıw, yaǵnıy óz xızmetin shólkemlestiriw hám iske asırıwda 
jáne de joqarı nátiyjelerge erisiw ushın belgili dárejede jańalıq hám 
ózgerisler kirgizip barıw áhmiyetli orın iyeleydi.
ISBILERMENLIKTIŃ ÁHMIYETI
Siz ózińizdiń shańaraǵıńızdıń turmıs sharayatınıń joqarı dárejede 
bolıwın qáleysiz be? Bul jaǵdaylardıń derlik kópshiligi isbilermenlik 
xızmeti arqalı jaratılatuǵının oylap kórgensiz be?
Isbilermenlik hárbir insandı belgili bir dáramat penen támiyinlep, 
onıń óz mútájliklerin tolıǵıraq qanaatlandırıp, turmıs dárejesin 
jaqsılawǵa imkaniyat jaratadı. Eger jámiyette isbilermenler kóp bolsa, 
onda tınıshlıq hám tatıwlıqqa, turaqlılıqqa umtılıw sonsha kúshli 
boladı. Isbilermenlik jaqsı rawajlanǵan jámiyette dóretiwshilik, ilim-
bilim hám sawap isler jetekshi orında turadı. 
Isbilermenlik óz xızmetinen tólenetuǵın salıq hám ajıratılǵan 
aqshalar arqalı mámlekettiń byudjet dáramatların da támiyinleydi. 
Byudjet qarjıları qansha kóp bolsa, jámiyet aǵzalarına xızmet 
etiwshi shárt-sharayatlar (úy-jaylar, jollar, medicina mákemeleri, 
oqıw orın-ları hám basqalar)dı jáne de jaqsılaw imkaniyatı payda 
boladı. Demek, isbilermenliktiń áhmiyeti, onıń hárbir shaxs, jámiyet 
hám mámlekettiń imkaniyatların keńeyttiriw arqalı kórinedi. Soǵan 
baylanıslı, elimizde isbilermenlik xızmeti mámleketimiz tárepinen 
qorǵaladı hám qollap-quwatlanadı.