Tolali ekinlar biologiyasi

G’o’za bargi barg shapolog’idan, barg bandidan va ikkita barg yonligidan iborat.
Barg shapolog’i g’o’zaning shakli va turiga qarab yaxlit yoki bo’laklarga bo’lingan bo’lishi mumkin. Dastlabki ikki – uch barg doimo yaxlit, keyingilari bo’laklarga bo’lingan bo’ladi. Barg shapolog’i o’simliklarning tur, naviga qarab har xil kattalikda 4 – 400 sm ² gacha bo’lishi mumkin. Bargning orqa tomonida 1-3-5 ta tomirida bittadan nektarnik (shiradon) bo’ladi.
Barglar yashil, och yashil, to’q yashil tusda tovlanadi, qizg’ish rangli g’o’zalar ham bor. Barglar tuklar bilan qoplangan, tuklar bir yoki ikki yarusli bo’ladi, tuksiz ham bo’lishi mumkin.
O’rta tolali g’o’zalarda bir tupdagi barg sathining yakuni avgust oyida 2,5-6,4 ming sm² ga, uzun tolali g’o’zalarda 5,1-9 ming sm² ga baravar bo’ladi.
G’o’za guli. Ikki jinsli, organlari besh doirada beshtadan bo’lib joylashgan (3-4 rasm). Tuzilish tashqi tomonidan uchta yirik gulyonligi; keyin gul kosachasi; kosa ichida tag tomonidan o’zaro birikkan gultoji bargi; gultojidan ichkarida otalik kalonkasi (androsey) bor. Kalonka otalik iplari trubkasidan iborat bo’lib, sirtida juda ko’p otalik changchilari o’rnashgan: gulning qoq o’rtasida onalik (genesey) joylashadi, bu onalik tuguncha pocha va og’izchadan iborat. G’o’za gulida alohida shiradon (nektarnik) bor.
G’o’za ko’sagi G’o’zaning mevasi ko’sak, shakli g’o’za turi va naviga qarab tuxumsimon, sholg’omsimon, dumoloq, anjirsimon bo’lishi mumkin. Uchi tumtoq, nayzasimon, cho’ziq yoki qisqa bo’ladi. Ko’sakdagi chigitli paxtaning og’irligi yovvoyi g’o’zalarda 0,1-0,25 g, madaniy shakllarida o’rta tolali g’o’zalarda 7-8 g, ingichka tolalilarda 3-4-5 g bo’ladi.
Sirti silliq, g’adir-budir, mayda bezcha va chuqurchalar bilan qoplangan, yaltiroq, xira, tukli va tuksiz, g’uborli bo’lishi mumkin. Tumshug’ida 3-4-5 burchakli yulduzchalar bor.
Rangi yashil, pushti yoki qizil bo’lishi mumkin. Ko’sak 3-4-5 chanoqli bo’lib, har bir chanog’ida 5-10 tadan chigit bo’ladi. Bir ko’sakda 25-50 tagacha chigit bo’lishi mumkin. Ko’sakning rivojlanishi 50-60 kun davom etadi. Ko’sak to’la pishgach quriydi va chanoqlaridan yoriladi.
CHigit. Pishib yetilgan chigit tuxumsimon yoki nok ko’rinishidadir. CHigit murtak (zarodish) va uni o’rab olgan ikkita po’stdan iborat, ichki po’st pardasimon, tashqi po’st yog’ochlanib qattiqlashgan bo’ladi. CHigit qobig’ining sirtqi sathi tuklar bilan qoplangan, bu tuklar ancha uzun bo’lib, tola deb ataladi, ba’zilarida uzun tuk bilan birga kalta tolalar bo’lib, uni momiq (linter) deb yuritiladi.
CHigitning keng tomoni xalaza, ingichka tomoni mikropil deyiladi. ekiladigan chigitning bo’yi-12-14 mm, diametri 6-8 mm bo’ladi, bir chigitning og’irligi o’sish sharoitiga qarab 50-200 mg gacha bo’lishi mumkin.
CHigit murtagi ikkita urug’palladan va o’simlikning asosiy organlarining boshlang’ichidan iborat bo’ladi. CHigit murtagidagi moy chigit og’irligining o’rtacha 20-25 % ni tashkil etadi. CHigit qobig’i juda mustahkam bo’lib, qalinligi 0,25 mm ga yetadi.
CHigitning rivojlanish davri 50-60 kun davom etadi. G’o’za ertapishar va o’sish sharoiti qancha qo’lay bo’lsa, chigit shuncha tez va yaxshi rivojlanadi.